31.7.07

Pechado por vacacións

¡ VACACIÓNS !

Dende o día 2 de agosto ata o día 2 de setembro pechamos por vacacións, toca cargar as pilas para seguir traballando o que resta de ano. ¡A disfrutar do verán!

26.7.07

Camiseta Club Alpino Ourensán

Camiseta home/nenos
Camiseta muller
CAMISETA CLUB ALPINO OURENSÁN

Xa temos no local social a nova camiseta do club, en cor naranxa e co logo do club, 15 cm. de diametro, estampado no peito. Como podedes ver nos dieños fixemos un modelo para homes e nenos e outro modelo para mulleres.
Tallas:
6-8-10 para nenos
S-M-L-XL para homes e mulleres
Unidades:
Tirada limitada de 300 unidades
Precio:
10 euros

18.7.07

Donde nace o vento...

Velaí vai un pequeno repaso fotográfico da actividade de montaña que nesta ventosa fin de semana nos levou ata o Torrecerredo.

Trepando...


Camiñando...

recuperando folgos...

intentado tocar o ceo...
e disfrutando da grandeza das formas calizas destas fermosas montañas...





16.7.07

BTT Ourense-Celanova-Ourense


Percorrido circular Ourense - Celanova
O domingo día 22.07.2007 sairemos dende Ourense para facer unha ruta circular en BTT para chegar a Vilanova dos Infantes (Celanova) e dende alí regresar o punto de partida por unha ruta diferente. Pasaremos polo Monte do Castro, os pobos de Sabucedo, Doniz e cruzaremos o Rio Arnoia. Para voltar pasaremos de novo o Arnoia por outro lado e iremos cara A Merca, Loiro e finalmente Ourense. Unhos 60 kilómetros por pistas, corredoiras e estradas comarcais que fan a ruta un tanto dura pero que tentaremos de levar con xeito.
OS DATOS
DATA: Domingo 22 de xullo de 2007
HORA: 09:00 horas
DIFICULTADE: Alta, 60 kilómetros con subidas e baixadas por pistas, corredoiras e estradas
LUGAR: Saída dende o local social do club
MATERIAL:Bicicleta, casco, augua e comida .

10.7.07

VII Concurso de fotografía Club Alpino Ourensán


VII CONCURSO DE FOTOGRAFÍA

CLUB ALPINO OURENSÁN


BASES

1. Concursantes e obras. Poderán participar tódolos socios do club que o desexen, excepto o gañador da edición anterior e os membros do xurado. Os autores poderán presentar un máximo de tres fotografías, en cor ou en branco e negro, non premiadas en calquera outro concurso. Só se admitirá un autor/a por obra.

2. Temática. Fotografías que estean relacionadas coas actividades levadas a cabo polos socios do club en tódalas súas modalidades: imaxes de alpinismo, escalada, esquí, espeleoloxía, descenso de canóns, paisaxes, flora, fauna, as súas xentes...

3. Tamaño e presentación. O formato fotográfico é libre, cun tamaño de papel mínimo de 20x30 cm.e máximo de 30x45 cm. As fotografías non deberán ir montadas nin reforzadas sobre cartolina, nin con passepartout. Farase constar no dorso de cada fotografía só o título da obra. Por cada fotografía e nun sobre pechado, indicando “VII Concurso de fotografía Club Alpino Ourensán” e o “título da obra”, deberá ir unha tarxeta co nome e apelidos do autor/a, teléfono, correo electrónico, título da obra e un breve texto explicativo, indicando como mínimo o lugar da fotografía e o equipo fotográfico empregado.

4. Presentación e envío. As obras entregaranse na sede do Club debidamente protexidas. O prazo límite de admisión de obras será o 27 de xullo de 2007, non admitíndose ningunha obra que chegue con posterioridade a este prazo. No sobre indicarase “VII Concurso de fotografía Club Alpino Ourensán”.

5. Premios. Cada autor só poderá acadar un premio. O importe do premio farase con cheques regalos que poderán ser trocados nos establecementos patrocinadores do concurso. Dotación dos premios:

· 1º Premio: 250 euros

. 2º Premio: 150 euros

· 3º Premio: 100 euros

· Premio especial do Club: 150 euros (Elixida en reunión pola xunta directiva como foto representativa do club)

6. Xurado e resolución. O xurado, estará formado por ao menos un profesional da fotografía, polo gañador do concurso anterior e por un socio do club elixido pola xunta directiva. O resultado comunicaráselles aos gañadores por teléfono ou correo electrónico e farase público a partires do 1 de outubro.

As decisións do xurado serán inapelables.

7. Difusión, exposición e entrega de premios. O club Alpino Ourensán, conxuntamente co Outono Fotográfico, realizará unha exposición coas obras seleccionadas, do 1 ao 15 de novembro de 2007. A entrega de premios efectuarase na cena anual do club da que se dará cumprida información. As obras seleccionadas poderán saír editadas en publicacións posteriores, coa intención de difundir o concurso, sen ánimo de lucro. Nas obras expostas e/ou publicadas indicarase o autor/a.

8. Disposición das obras. As obras premiadas quedarán en propiedade do Club Alpino Ourensán, que poderá copialas ou utilizalas sen limitación de medios, tempo ou lugar, para promoción e divulgación, con indicación do nome do seu autor/a. As obras non premiadas poderán ser retiradas polos seus autores no Club, a partires do 3 de decembro de 2007. Se as obras non son reclamadas antes do 4 de febreiro de 2008 enténdese que o autor renuncia a elas.

9. Observacións. Os participantes responsabilizaranse totalmente de que non existan dereitos de terceiros nas obras presentadas, así como de toda reclamación por dereitos de imaxe. A organización poñerá o máximo coidado na conservación das obras, pero non se responsabilizará das posibles perdas, subtraccións ou deterioro. A organización queda facultada para resolver calquera continxencia non prevista nestas Bases. A concorrencia a este concurso implica a aceptación das presentes Bases